Համաշխարհային ընթերցումներ

Համաշխարհային ընթերցումներ, 2015, Երևան, Հայաստան

Բեռլինի Գրականության Միջազգային Փառատոնն ու Պոտսդամի Լեփսիուսհաուզը 2015թ․ապրիլի 21-ին ՀԱՄԱՇԽԱՐՀԱՅԻՆ ԸՆԹԵՐՑՈԻՄՆԵՐ են կազմակերպում՝ ոգեկոչելու Հայոց ցեղասպանության 100-ամյակը։ Համաշխարհային ընթերցումներին մասնակցելու ցանկություն են հայտնել ավելի քան 400 անհատներ և բազմաթիվ կազմակերպություններ։ Ընթերցումների աշխարհագրությունը կընդգրկի մոլորակի գրեթե 70 երկիր՝ Ալբանիայից մինչև Զիմբաբվե։

Ի թիվս մյուս հարգարժան ստորագրյալների, այս բացառիկ նախագծին ցանկություն են հայտնել մասնակցել նաև 5 նոբելյան մրցանակակիրներ՝ Մարիո Վարգաս Լիոսան /Mario Vargas Llosa/, Հերտա Մյուլլերը / Herta Müller/, Էլֆրիեդե Յելինեկը /Elfriede Jelinek/, Ջոն Քեթցեն /John Coetzee/ և Օրհան Փամուկը /Orhan Pamuk/։ Ամենուր ընթերցումները տեղի են ունենալու նույն օրը։

Վերոհիշյալ օրը Բեռլինում և Պոտսդամում ընթերցումները կընդգրկի ռումինահայ գրող Վարուժան Ոսկանեանի «Շշուկների Մատեան» գրքի գերմաներեն թարգմանության շնորհանդեսը, որի ընթացքում կընթերցվեն հատվածներ գրքից։ Աշխարհի մյուս ծիրերում կընթերցվեն և կքննարկվեն հայազգի այլ գրողների ստեղծագործություններ։

Ի թիվս այլ կազմակերպությունների, ապրիլ 21-ի ընթերցումները Հայաստանում կհամակարգի Երևանի Ժամանակակից Արվեստի Ինստիտուտը /www.ica.am/՝ համագործակցությամբ Երևանի Թեքեյան Կենտրոնի։ Կընթերցվեն հատվածներ Երվանդ Օտյանի «Անիծեալ տարիներ» 1914-1919թթ․ անձնական հիշատակներից։ Հավաքը կվարի երաժշտագետ, արվեստաբան Մարինե Կարոյանը։ Այն տեղի կունենա Թեքեյան մշակութային կենտրոնի գրադարանի դահլիճում։

Ի թիվս հայ մտավորականության այլ ներկայացուցիչների, ընթերցումներին ու դրան հետևող մտքերի փոխանակմանը կմասնակցեն հետևյալ ստորագրյալները՝

Հասմիկ Պապյան, /երգչուհի, միջազգային մրցույթների դափնեկիր/,

Տիգրան Մանսուրյան /կոմպոզիտոր/,

Հակոբ Ավետիքյան /«Ազգ» շաբաթաթերթի գլխավոր խմբագիր/,

Պարգև Շահբազյան /Վազգեն I կաթողիկոսի երկարամյա օգնական, «Էջմիածին» ամսագրի խմբագիր/,

Նարե Կարոյան /դաշնակահարուհի, միջազգային մրցույթի դափնեկիր/,

Երվանդ Տեր-Խաչատրյան /արվեստաբան, գրականագետ/,

Վահրամ Մարտիրոսյան /գրող, հրապարակախոս, թարգմանիչ/, Անահիտ Աստոյան /բանասեր, «Դարի կողոպուտ» /2013/ գիրք/հետազոտության հեղինակ/, Գուրգեն Գասպարյան /գրականագետ, Մատենադարանի ավագ աշխատակից/, և այլն։

Մեր ցանկությունն է իրականացնել մի ձեռնարկ, որը կդառնա մշակութային իրադարձություն (manifestacion culturelle)։ Ընթերցումները կսկսվեն թուրք արվեստագետ Սյուզան Մերյեմ Ռոսիտայի /Suzan Meryem Rosita/ «Լուռ գիրք» պերֆորմանսով։ Կավարտեն ընթեցումները բլուլահար Նորայր Քարտաշյանի ելույթով։